Unique Word Count: 237
Ar mo dhul chuig an Aifreann le toil na ngrásta
Bhí an lá ag cur báistí is d'ardaigh gaoth,
Casadh an ainnir liom taobh Chill Tartáin
Is thit mé láithreach i ngrá le mnaoi.
Labhair mé léi go múinte, mánla
Is de réir a cáilíochta d'fhreagair sí,
'S é dúirt sí "Raiftrí, tá m'intinn sásta,
Agus gluais go lá liom go Baile Uí Laoi."
Nuair a fuair mé an tairiscint níor lig mé ar cairde í,
Rinne mé gáire agus gheit mo chroí;
Ní raibh le dul againn ach trasna páirce,
Is níor thug muid an lá linn ach go tóin an tí.
Leagadh chughainn bord a raibh gloine is cárt air
Is cúileann fháinneach le m'ais ina suí,
'S é dúirt sí "Raiftrí, bí ag ól is céad fáilte,
Tá an siléar láidir i mBaile Uí Laoi."
Nach aoibhinn aerach ar thaobh an tsléibhe
is tú ag féachaint síos uait ar Bhaile Uí Lí.
Ag siúl na ngleannta ag baint cnó is sméara
‘s ceiliúr éan ann mar na ceolta sí.
Níl brí sa méid sin dá bhfaigheá léargas
ar bhláth na gcraobh ‘tá lena thaobh.
Níl maith dá shéanadh níos faide ar aon neach,
a spéir na gréine, is tú grá mo chroí.
Shiúil mé Sasana is an Fhrainc le chéile,
An Spáinn, an Ghréig is ar ais arís,
Ó bhruach Loch Gréine go Béal na Céibhne,
Is ní fhaca mé féirín ar bith mar í.
Dá mbeinnse pósta le bláth na hóige,
Trí Loch an Tóraic a leanfainn í,
Cuanta is cóstaí go siúlfainn, is bóithre,
I ndiaidh na seoidmhná ata i mBaile Uí Laoi.
'S í Máire Ní Eidhin an staidbhean bhéasach
Ba dheise méin agus b'áille gnaoi,
Dhá chéad cléireach is á gcur le chéile
Agus trian a tréithe ní fhéadfadh scríobh.
Bhuail sí Deirdre le breáthacht is Vénus,
Is dá n-abrainn Helen ler scriosadh an Traí,
'S í scoth mhná Éireann as ucht an méid sin,
An pabhsae gléigeal atá i mBaile Uí Laoi.
A réalt an tsolais, is a ghrian bhreá an fhómhair,
a chúilín ómra, a mheall mo chroí
Siúil ar uaigneas liom go ndéanam comhairle
faoi choinne an Domhnaigh cá mbeidh ár suí.
Níor mhór liom ceol duit gach aon tráthnóna
puins ar bord is dá n-óltá fíon
Ach a Rí na Glóire, go dtriomaí an bóthar
Nó go bhfaighidh mé an t-eolas ar ais aríst.
-Antaine Ó Raiftéirí